RSS
 

აკაკი წერეთელი / გლეხის საჩივარი

17 მარ 2016
დიდება შენდა, უფალო!
რასა გვთხოვს? რა მოუცია,
რომ ჩამოგვიდგა ჭირივით
სოფელში ეგზეკუცია?
სადღაც ვიღაცას რაღაცა
ვითომდა ჩაუდენია,
ახლა ჩვენ გვახდევინებენ,
მოგვდვეს ცეცხლი და გენია!
კომლზე სამ-სამი თუმანი
ადვილად გაუწერია!
თითქოს ეს გადასახადი
გლეხისთვის არაფერია!
სად შეგვიძლია ამდენი,
რომ მოვაგროვოთ ხელადა?
უნდა შორს სადმე წავიდეთ
ფულების საძებნელადა.
რომ დავბრუნდებით, დაგვხვდება
სოფელი აოხრებული,
ცოლ-შვილი ნამუსახდილი,
ოჯახი ატირებული.
რომელ ერთს უნდა გავუძლოთ,
სირცხვილს, თუ აოხრებასა?
რად არ მოხედავ, უფალო,
გლეხკაცის გაჭირვებასა

დამატებულია Giorgi-ს მიერ
 
 
 

კატეგორია: აკაკი წერეთელი | ნანახია 415-ჯერ

 
avatar